17.12.21. აჭარის ა/რ სავაჭრო-სამრეწველო პალატას თურქეთის რესპუბლიკის ქალაქ ჩარშამბას სავაჭრო სამრეწველო პალატის თავმჯდომარე აჰმედ ილმაზი,  სამსუნისა და სტამბულის  ანადოლუს სამედიცინო ცენტრის  გენერალური დირექტორის მოადგილე ფათიხ ესენი,  სამსუნის უნივერსიტეტის და კერძო საავადმყოფოების ასოციაციის წევრი პროფესორები: ნიზამეტტინ კოჩკარა, აჰმეთ ისსინ, ვოლკან გური სტუმრობდნენ.

შეხვედრას ესწრებოდნენ აჭარის ა/რ სავაჭრო-სამრეწველო პალატის თავმჯდომარე გიორგი რომანაძე, პალატის  თავმჯდომარის პირველი მოადგილე ნინო დოლიძე, აჭარის ა/რ ჯანმრთელობისა და სოციალური დაცვის მინისტრის მოადგილე მარინა ზანაქიძე, აჭარის ა/რ ტურიზმისა და კურორტების დეპარტამენტის თავმჯდომარის მოადგილე თამაზ ახვლედიანი, აჭარის ა/რ ტურიზმისა და კურორტების დეპარტამენტის საზოგადოებასთან ურთიერთობისა და რეკლამის სამსახურის ხელმძღვანელი ნინო ხახუბია, პალატის თავმჯდომარის მრჩევლები თამაზ შავაძე და ლაშა ბოლქვაძე.

სამედიცინო ტურიზმი თურქეთში განსაკუთრებით აქტუალურია და მსოფლიო ქვეყნებს შორის მაჩვენებლით მესამე ადგილი უკავია. თურქეთის წამყვანი კლინიკები პაციენტებს  სტანდარტების შესაბამის სამედიცინო მომსახურებას და პერსონალის კვალიფიკაციის მაღალ დონეს  სთავაზობენ.  საქართველოდან სამედიცინო მომსახურების მიღების მსურველთა რაოდენობა ბოლო წლების განმავლობაში მნიშვნელოვნად გაიზარდა. პანდემიამ გარკვეული სირთულეები შექმნა ამ მიმართულებით. თურქული დელეგაციის ვიზიტის მიზანია თანამშრომლობა სამედიცინო ცენტრებთან და სამედიცინო მომსახურების გაწევა ადგილობრივ კლინიკებში. პაციენტებს მიეცემათ საშუალება მიიღონ კვალიფიციური მკურნალობა  თურქეთში გამგზავრების გარეშე.

შეხვედრაზე განიხილეს  მომავალი თანამშრომლობის მიმართულებები, დაიგეგმა  ერთობლივი შეხვედრები სამედიცინო სფეროს წარმომადგენლებთან.

9.12.21. აჭარის ა/რ სავაჭრო-სამრეწველო პალატის თავმჯდომარე გიორგი რომანაძე და თავმჯდომარის პირველი მოადგილე ნინო დოლიძე, USAID- ის  ადამიანური და ინსტიტუციური შესაძლებლობების განვითარების პროექტის (HICD) მენეჯერს დავით ძებისაშვილს და USAID-ის ადამიანური და ინსტიტუციური შესაძლებლობების განვითარების პროექტის(HICD) დირექტორს რომან ცუცქირიძეს შეხვდნენ.

HICD პროექტი კომპლექსური მიდგომების გამოყენებით და ადამიანის პროდუქტიულობის ამაღლების ტექნოლოგიებზე დაყრდნობით, უზრუნველყოფს პარტნიორი ორგანიზაციების მუშაობის სისტემურ გაუმჯობესებას,

პროექტის მიზანია ხელი შეუწყოს ორგანიზაციებს  დამოუკიდებლად გამოავლინონ და გადაჭრან პროდუქტიურობის კუთხით არსებული ხარვეზები.  პროექტის ფარგლებში დაარსდება განვითარების ცენტრი, როგორც  HICD-ის სფეროში ცოდნის გაზიარებისა და გაცვლის ეფექტიანი ქსელი.

პროექტი  გააძლიერებს ადგილობრივი საკონსულტაციო ორგანიზაციების ცოდნას და შესაძლებლობებს, განავითარებს მათ ორგანიზაციულ სისტემებს, პოლიტიკასა და პროცედურებს დონორთა მსხვილი პროექტების დამოუკიდებლად განსახორციელებლად.

HICD პროექტი ასევე უზრუნველყოფს USAID-ის პროგრამებისთვის J-1 ვიზის მისაღებად საჭირო პროცედურების განხორციელებას. პროექტი მჭირდოდ ითანამშრომლებს USAID-ის სხვა პროექტებთან და დაეხმარება მათ ორგანიზაციული და ტექნიკური უნარების განვითარებასა და სექტორული ცოდნის გაღრმავებაში.

შეხვედრაზე  დაწვრილებით ისაუბრეს პროექტის მიზნებსა და მოსალოდნელ შედეგებზე.  მხარეები  შეთანხმდნენ მომავალ თანამშრომლობაზე.

6.12.21 აჭარის ა/რ სავაჭრო-სამრეწველო პალატის თავმჯდომარე გიორგი რომანაძე და თავმჯდომარის პირველი მოადგილე ნინო დოლიძე WIN In Georgia-ს პროექტის ფარგლებში შეხვდნენ Green Step, Linking Foundation, Centrum Badawczo-Rozwojowe Innowacji Społecznych AIK -ის წარმომადგენლებს. შეხვედრაზე  ისაუბრეს ორგანიზაციის განხორციელებულ და მიმდინარე აქტივობებზე და პროექტებზე. ასევე მოხდა ინფორმაციის გაცვლა WIN In Georgia-ს პროექტთან დაკავშირებით და გამოიკვეთა სამომავლო ურთიერთთანამშრომლობის შესაძლებლობები.

პროექტი დაფინანსებულია პოლონეთის საგარეო საქმეთა სამინისტროს Polish Aid – „Polska Pomoc Rozwojowa 2021“-ის მიერ. პოლონეთიდან მთავარი პარტნიორია ფონდი ,,Fundacja Wspierania Więzi Lokalnych – Linking Foundation” და საქართველოდან ” Green Step”.

პროექტის მიზანია დაეხმაროს ქალებს სხვადასხვა ბიზნეს შესაძლებლობების გაღრმავებაში და საერთაშორისო ქსელში ჩართვაში.

შეხვედრის შემდეგ პალატაში გაიმართა WIN in Georgia – ს პროექტის ფარგლებში დაგეგმილი კონფერენცია. პროექტის მონაწილეებს გადაეცათ სერტიფიკატები.

02.12.2021 აჭარის ა.რ. სავაჭრო-სამრეწველო პალატაში ვიზიტით იმყოფებოდნენ  USAID ეკონომიკური განვითარების ოფისის პროექტების მენეჯერი მარინა ქუთათელაძე, USAID ,,დამსაქმებლები პროფესიული განათლებისთვის’’ პროგრამის ხელმძღვანელი როზა ჩიაპე, USAID ,,დამსაქმებლები პროფესიული განათლებისთვის’’ პროგრამის ხელმძღვანელის მოადგილე საბა სარიშვილი და USAID ,,დამსაქმებლები პროფესიული განათლებისთვის’’ პროგრამის, კერძო სექტორის ჩართულობის კომპონენტის ხელმძღვანელი ირინა წეროძე.

შეხვედრაზე დეტალურად ისაუბრეს პროექტზე და აღნიშნეს, რომ  სავაჭრო სამრეწველო პალატის აქტიური და მდგრადი ჩართულობა მნიშვნელოვნად შეუწყობს ხელს  პროექტის წარმატებით განხორციელებას.

აშშ საერთაშორისო განვითარების სააგენტოს (USAID) ახალი ხუთწლიანი პროგრამა “დამსაქმებლები პროფესიული განათლებისთვის”,  მიზნად ისახავს დამსაქმებლებისა და საგანმანათლებლო დაწესებულებების თანამშრომლობის სტიმულირებას, კერძო სექტორთან თანამშრომლობით პროფესიული პროგრამების შემუშავებასა და ხარისხის საერთაშორისო სტანდარტების დამკვიდრების ხელშეწყობას. პროგრამა დაეხმარება სტუდენტებს, პროფესიონალებსა და დასაქმების მაძიებლებს, განავითარონ შრომის ბაზრის მოთხოვნის შესაბამისი უნარები და დასაქმდნენ, რაც, საბოლოოდ, ჩვენს ქვეყანაში უმუშევრობის შემცირებასა და მდგრადი ეკონომიკის განვითარებას უზრუნველყოფს.

შეხვედრას ესწრებოდნენ აჭარის ა.რ. სავაჭრო-სამრეწველო პალატის თავმჯდომარე გიორგი რომანაძე, აჭარის ა.რ. სავაჭრო-სამრეწველო პალატის პირველი მოადგილე ნინო დოლიძე, აჭარის ა.რ. სავაჭრო-სამრეწველო პალატის მოადგილე თამაზ თურმანიძე.

2021 წლის 24 ნოემბერს აჭარის ა/რ სავაჭრო-სამრეწველო პალატას თურქეთის რესპუბლიკის ,,დამოუკიდებელ  მრეწველთა და ბიზნესმენთა ასოციაციის” (MUSIAD) ქ. გუმუშჰანეს ფილიალის თავმჯდომარე აბდულბაქი ქარა,  MUSIAD ბათუმის ფილიალის თავმჯდომარე ჰამზა ქოსე, ფილიალისა და მმართველთა საბჭოს წევრები  ეწვივნენ.

დელეგაციაში შემავალი ბიზნესმენები საკვები პროდუქტების, ავეჯის, სამშენებლო მასალების, მინის წარმოების და სხვა სექტორებს წარმოადგენენ.

შეხვედრის მსვლელობისას მხარეებმა ისაუბრეს პანდემიის მიერ შექმნილ ეკონომიკურ კრიზისზე, ორი ქვეყნის ურთიერთობების გაღრმავების აუცილებლობაზე, ერთობლივად სხვადასხვა ღონისძიებების დაგეგმვაზე, ქვეყანაში არსებულ ეკონომიკურ და  საინვესტიციო გარემოზე, ახალი ინვესტიციების მოზიდვის მნიშვნელობაზე.

აჭარის ა.რ. სავაჭრო-სამრეწველო პალატის თავმჯდომარემ გიორგი რომანაძემ  აღნიშნა, რომ  პალატისა და ,,დამოუკიდებელ  მრეწველთა და ბიზნესმენთა ასოციაციის” მჭიდრო თანამშრომლობა ხელს შეუწყობს ქვეყანაში ერთობლივი ბიზნეს აქტივობების განხორციელებას,  საწარმოების შექმნას და ჩვენს ქვეყნებს შორის სავაჭრო და ეკონომიკური ურთიერთობების კიდევ უფრო განვითარებას.

შეხვედრას ესწრებოდნენ: აჭარის ა/რ სავაჭრო-სამრეწველო პალატის თავმჯდომარის მრჩეველი საინვესტიციო საკითხებში თამაზ შავაძე და აჭარის ა/რ სავაჭრო სამრეწველო პალატის თავმჯდომარის მრჩეველი დიპლომატიურ საკითხებში ლაშა ბოლქვაძე.

11.11.2021 აჭარის ა.რ. სავაჭრო-სამრეწველო პალატის თავმჯდომარეს, გიორგი რომანაძეს, საპატიო ვიზიტით  ეწვია აზერბაიჯანის რესპუბლიკის  გენერალური კონსული  ქ. ბათუმში პარვიზ ისმაილზადა

შეხვედრაზე მხარეებმა ისაუბრეს  ეკონომიკური თანამშრომლობის საკითხებზე, განხილულ იქნა მიმდინარე წლის დეკემბერში  აზერბაიჯანის მცირე და საშუალო ბიზნესის ხელშეწყობის სააგენტოს (KOBIA) მიერ დაგეგმილი  ბიზნეს ფორუმის ჩატარების საკითხები. ფორუმის მიზანია სავაჭრო და ეკონომიკური კავშირების გაძლიერება, საქართველოში ინვესტირებითა და ბიზნესის წარმართვით დაინტერესებული აზერბაიჯანული კომპანიებისათვის აქ არსებული ბიზნესგარემოსა და შესაძლებლობების გაცნობა, “B2B” ფორმატის შეხვედრები.

ბატონმა პარვიზ ისმაილზადამ აღნიშნა, რომ საქართველოში  ორასამდე აზერბაიჯანული კომპანია ფუნქციონირებს, თუმცა აჭარის რეგიონის შესაძლებლობებს ნაკლებად იცნობენ და გამოთქვა მზაობა განხორციელდეს  აზერბაიჯანული  დელეგაციის ვიზიტი რეგიონის საინვესტიციო გარემოსა და შესაძლებლობების გაცნობის მიზნით.

საუბრის დასასრულს მხარეებმა დაადასტურეს მზადყოფნა  მაქსიმალურად ხელი შეუწყონ ურთიერთხელსაყრელი თანამშრომლობის კიდევ უფრო გაღრმავებას.

შეხვედრას   ესწრებოდა აჭარის ა.რ. სავაჭრო-სამრეწველო პალატის თავმჯდომარის  მრჩეველი საინვესტიციო საკითხებში თამაზ  შავაძე.

2021 წლის 29 ოქტომბერს აჭარის ა.რ. სავაჭრო სამრეწველო პალატას საქმიანი ვიზიტით სტუმრობდა თურქეთის რესპუბლიკის ქალაქ  ჩარშამბას სავაჭრო-სამრეწველო პალატის თავმჯდომარე ბატონი აჰმეთ ილმაზი და მმართველთა საბჭოს წევრები, ბიზნესმენები, ასევე, თურქეთის დაპატენტების, დიზაინის და მარკირების სამრეწველო პალატის პრეზიდენტი.

შეხვედრა გაცნობითი ხასიათის იყო და  მიზნად ისახავდა საქართველოსა და თურქეთს შორის არსებული თანამშრომლობის  განმტკიცებას, ეკონომიკური კრიზისის დაძლევასა და ახალი ეკონომიკური სტრატეგიის დასახვას, პანდემიის პირობებში ერთობლივი აქტივობებისა და ღონისძიებების განხორციელებას.

საქართველოს, ევროკავშირსა და თურქეთს შორის ოფიციალურად ამოქმედდა ე.წ. „დიაგონალური კუმულაცია“, რომლითაც თურქული ნედლეულით საქართველოში დამზადებული პროდუქციის ექსპორტი ევროკავშირის ბაზარზე თავისუფალი ვაჭრობის რეჟიმით იქნება შესაძლებელი.  „დიაგონალური კუმულაციის“ ამოქმედება  განსაკუთრებით მნიშვნელოვანია საქართველოში ისეთი ინდუსტრიების განვითარებისთვის, როგორიცაა ტექსტილის, ავეჯის, საშენი მასალების, პლასტმასის ნაწარმისა და სხვა. ,,დიაგონალური კუმულაცია” დამატებით სტიმულს მისცემს ადგილობრივი წარმოების განვითარებას და მნიშვნელოვნად გაზრდის ქვეყანაში მეტი დამატებითი ღირებულების, ახალი საწარმოების, სამუშაო ადგილების შექმნასა და ახალი ინვესტიციების მოზიდვას. შეიქმნება ბევრი ახალი კომპანია, მათ შორის ერთობლივი ქართულ-თურქული, რაშიც  სავაჭრო სამრეწველო პალატის როლი უმნიშვნელოვანესი იქნება.
შეხვედრამ ნაყოფიერად ჩაიარა. დასასრულს მხარეებმა გამოხატეს მზაობა  თანამშრომლობის კიდევ უფრო გაძლიერებაზე.

2021 წლის 19 ოქტომბერს აჭარის ა.რ სავაჭრო-სამრეწველო პალატისა და ბელარუსის სავაჭრო-სამრეწველო პალატის  გროდნოს განყოფილების  თანამონაწილეობით ჩატარდა ონლაინ შეხვედრა. შეხვედრაში მონაწილეობდნენ  აჭარის სავაჭრო-სამრეწველო პალატის თავმჯდომარის მოადგილე ჯუმბერ ტუღუში, დეველოპერული კომპანია ‘’ჰორიზონტ გრუპ’’-ის ხელმძღვანელი  ლაშა ახალაია, ბელარუსის სავაჭრო-სამრეწველო პალატის გროდნოს განყოფილების გენერალური დირექტორის მოადგილე საგარეო ეკონომიკური საქმიანობის დარგში კონსტანტინ კაიკოვი, საგარეო ეკონომიკური საქმიანობის განყოფილების წამყვანი სპეციალისტი ალექსანდრ დობროდუშენკო, გროდნოს სარიელტორო მომსახურების სააგენტოს წარმომადგენლები: ტატიანა გრაჩეკი, არტურ ზალევსკიო, ლიდია შილო და  გროდნოში მოქმედი რიელტორები: ვლადიმირ პილსკი, ვადიმ კარპინსკი, ვადიმ კვასოვკა და სერგეი შჩერბიჩი.

ბატონმა ლაშა ახალაიამ თავის პრეზენტაციაში სრულად წარმოადგინა კომპანიის მიღწევები, მისი სიმძლავრეები, ამომწურავად უპასუხა ბელარუსი რიელტორების  ყველა  შეკითხვას. შეხვედრა ჩატარდა საქმიან ვითარებაში.  შეხვედრის მონაწილეთა მხრიდან გამოიხატა  დაწყებული ურთიერთობების შემდგომი გაგრძელების  სურვილი და მზადყოფნა.

აჭარის ა.რ. სავაჭრო-სამრეწველო პალატა კვლავაც აგრძელებს სხვადასხვა ქვეყნის ორგანიზაციებთან და უწყებებთან გაფორმებული მემორანდუმების  საფუძველზე მსგავსი შეხვედრების ჩატარებას, რაც არსებული პანდემიის პირობებში განსაკუთრებით მნიშვნელოვანია რეგიონში მოქმედი ბიზნეს სუბიექტების წარმატებული ფუნქციონირებისათვის.

აჭარის ა.რ. სავაჭრო-სამრეწველო პალატაში ვიზიტით იმყოფებოდნენ კავკასიის ალიანსების პროგრამის  დონორი ორგანიზაციის – შვეიცარიის განვითარებისა და თანამშრომლობის სააგენტოს წარმომადგენლები   დანიელ მევლი (სააგენტოს ხელმძღვანელი), ფლორენს ჯოლიდონი  და თეიმურაზ ხომერიკი, კავკასიის ალიანსების პროგრამის ხელმძღვანელი ჰელენ ბრადბური და მოადგილე გიორგი სადუნიშვილი.

ვიზიტის მიზანს წარმოადგენდა  თანამშრომლობის საკითხების განხილვა, საინფორმაციო-საკონსულტაციო სივრცე ,, ქალთა ოთახი’’-სა და აჭარის მეფუტკრეობის ბიზნეს ასოციაციის საქმიანობის გაცნობა.

შეხვედრაზე ისაუბრეს ერთობლივად განხორციელებულ პროექტებსა და შედეგებზე, წარმოდგენილი იყო მეწარმე ქალთა ფორუმებისა და თაფლის ფესტივალების ფოტოები, ქალთა ოთახის პრეზენტაცია. მხარეებმა სამომავლო თანამშრომლობის კიდევ უფრო გაღრმავებისა და დაახლოების სურვილი გამოთქვეს.

აჭარის ა.რ. სავაჭრო-სამრეწველო პალატის თავმჯდომარემ  გიორგი რომანაძემ მადლობა გადაუხადა შვეიცარიის განვითარებისა და თანამშრომლობის სააგენტოს   რეგიონში გაწეული საქმიანობისთვის და იმედი გამოთქვა, რომ მათი ჩართულობა და მხარდაჭერა რეგიონის განვითარების საქმეში მომავალშიც გაგრძელდება.

2021 წლის 14 სექტემბერს  შედგა ონლაინ  შეხვედრა აჭარის ა.რ. სავაჭრო-სამრეწველო პალატისა  და ბელარუსის სავაჭრო პალატის გროდნოს განყოფილების ხელმძღვანელებს შორის.

შეხვედრის ფარგლებში განხილულ იქნა სავაჭრო-ეკონომიკური თანამშრომლობის განვითარების პერსპექტივები. მხარეებმა ისაუბრეს აჭარისა და გროდნოს პალატების არსებულ და მომავალ თანამშრომლობაზე. გამოიკვეთა მიმართულებები, სადაც უახლოეს დროში შესაძლებელია ურთიერთხელსაყრელი ურთიერთობა ქართველ და ბელარუს ბიზნესმენებს შორის:ტურიზმი, ბინათმშენებლობა, ციტრუსოვანთა ნაყოფის ექსპორტი აჭარიდან. აღნიშნული მიმართულებები მნიშვნელოვანია ჩვენი რეგიონისთვის და საინტერესოა ბელორუსის გროდნოს ოლქში მოღვაწე ბიზნესმენებისთვის.

გროდნოს პალატის გენერალურმა დირექტორმა მიროსლავ საროსეკმა  გამოთქვა სურვილი  რეგიონში მოქმედ ბიზნეს სუბიექტებთან ერთად ეწვიოს აჭარას და გაიმართოს B2B შეხვედრები ქართველ და ბელარუს მეწარმეებსა და ბიზნესმენებს შორის.

აჭარის ა.რ. სავაჭრო-სამრეწველო პალატის თავმჯდომარე გიორგი რომანაძე მიესალმა ამ წინადადებას და თავის მხრივ დაარწმუნა კოლეგები, რომ მათი სტუმრობა მაქსიმალურად ნაყოფიერი იქნება და მისცემს შესაძლებლობას მხარეებს გაფორმდეს კონკრეტული ხელშეკრულებები.

შეხვედრაზე აღინიშნა, რომ სავაჭრო პალატებს შორის თანამშრომლობა კიდევ უნდა გაფართოვდეს, რაც ითვალისწინებს ორი ქვეყნის ბიზნესმენთა შესაძლებლობების მონიტორინგს პალატების მხრიდან, იმპორტ-ექსპორტის, ტრანზიტისა და არსებული სხვა შესაძლებლობების გამოყენებით, რაზედაც მხარეები ერთობლივად შეთანხმდნენ.